Новую кнігу гомельскага пісьменніка са смачнай назвай «Булочка» склалі лепшыя ягоныя гумарэскі на трох мовах – беларускай, рускай і ўкраінскай. Зразумела, выбар моў для кнігі не выпадковы: Гомель знаходзіцца на перакрыжаванні трох братніх славянскіх краін, з вельмі блізкімі культурнымі традыцыямі і побытам, а, значыць, і гумар кнігі будзе аднолькава зразумелы для беларусаў, рускіх і ўкраінцаў. Падчас вечарыны аўтар выказаў спадзяванне, што на хвалі пошукаў новых бакоў узаемадзеяння паміж краінамі братэрскага саюза кнігай зацікавяцца ўлады і пасадзейнічаюць яе распаўсюджанню, нават па-за межамі нашай рэспублікі.Васіль Юр’евіч, сябра Саюза пісьменнікаў Беларусі і Саюза тэатральных дзеячаў, чалавек вяселы, ён смяецца сам і сваімі творамі весяліць іншых. «Гумарэскі нібыта ўзяты з самаго жыцця» – гаворыцца ў анатацыі да кнігі. І гэта сапраўды так: героі ягоных твораў – простыя людзі, якія жывуць сярод нас і часам трапляюць у самыя недарэчныя сітуацыі. Важна, што смяецца пісьменнік з людзей па-добраму, не крыўдна, а таму колькасць прыхільнікаў яго творчасці толькі расце. Упэўнена, чытаючы гэтую кнігу, сумаваць не прыйдзецца нікому. Як не прыйшлося сумаваць гасцям салона, бо з самага пачатку прэзентацыі кнігі гасцей захапіла сцэнічнае дзеянне ў выкананні студэнцкага тэатра Гомельскага дзяржаўнага ўніверсітэта імя Ф.Скарыны. Студэнты, як сапраўдныя акцёры, а не аматары, выдатна сыгралі ўрывак з п’есы «Следчы эксперымент».
Увогуле, вечар прайшоў вельмі лёгка і нагадваў хутчэй сяброўскую сустрэчу, на якой абмяркоўвалася падзея жыцця літаратурнага – выхад у свет новай кнігі. Вядучая вечарыны разам з аўтарам кнігі Васілём Ткачовым з першых слоў здзівілі слухачоў, бо ўвесь іх дыялог будаваўся на кулінарных паняццях: яны вырашалі, ці прыйдзецца да спадобы чытачам смак «Булочки» і ці не зачарсцвее яна на паліцах кніжных магазінаў.Сваімі ўражаннямі пасля прачытання «кулінарнага шэдэўра» повара Васіля Ткачова падзяліліся яго сябры і калегі: галоўны рэдактар газеты «Сяльмашавец» Мікалай Дзямчыхін, пісьменнік-гумарыст Барыс Кавалерчык, сябры Саюза пісьменнікаў Беларусі Яўген Калашнікаў і Лідзія Возісава, народны паэт Гомсяльмаша Мікалай Буткевіч і іншыя. Завітала на вечарыну галоўны рэдактар выдавецтва «Барк» Міла Беразоўская. Як аказалася, зарад гумару не быў абмежаваны сюжэтамі гумарэсак, а закрануў і час працы выдавецтва над кнігай – Міла Аляксандраўна падзялілася з аўдыторыяй парай вяселых выпадкаў, што суправаджалі выхад зборніка.
Госць вечара, вядучы акцер Гомельскага абласнога драматычнага тэатра Аляксей Бычкоў, прачытаў для заседацеляў салона выбраную гісторыю з «Булочки» адразу на трох мовах. А напрыканцы сустрэчы Васіль Юр’евіч зачытаў свае апошнія гумарэскі, і паабяцаў, што зусім хутка яны складуць новую кнігу. Будзем чакаць, а пакуль што раім вам пачаставацца «Булочкой» − кніга здольна наталіць любы літаратурны апетыт.
Марына Ступінская